Tranbia Antxotik

1890ean Donostia eta Errenteria arteko tranbiak bide zati berria zabaldu zuen Antxoraino. Portura sartzeko adarra ere bazuen Reloj eta Eskalerillas izeneko parajeen artean, merkatalgaiak eramateko. Adar txiki hau Tolosako tranbiak erabili zuen batez ere, bertaraino berorrenak ziren ibilgailuak ekarriz. Antiguo auzoan zegoen “Lagarto” xaboi lantegira merkatalgaiak eraman eta ekartzen zituen; portutik kokoak eramaten ziren lantegi horretara, bertan xaboia egiteko erabiltzen zen koipea ateratzen baitzieten. Añorgako Rezolaren lantegitik berriz, zementua ekartzen zuen Pasaiara. Bitxia izango zen gero Donostiako Boulebardean zehar merkatalgaiez zamatutako bagoien joan-etorria ikusteak.